Преп. Максим Грек. Песнь благодарственная к Пресвятей Троице, глаголемая во всю Светлую Неделю Пасхи

Слава Тебе, преблагий Боже Отче Вседержителю, слава Тебе и поклонение и велелепие от всея видимыя и мысленныя твари ныне и в безконечныя веки! Како достойне аз, перстный и страстный, неблагодарное создание пречистых рук Твоих, воспою и славословлю безчислосиянную державу божественного Ти величества и неизследованную бездну благости и человеколюбия Твоего, еже к нам неблагодарным, зане отступивших нас от Твоея благости и люте нечествовавших на ню и всякою злобою, преслушанием же и непокорством огорчевавших Твоя человеколюбныя утробы, не престал еси милуя нас и промышляя о нас и питая и обращая от пути прелести нашея на путь истины Твоея, чюдесы предивными, пророки же и законом и заповедми спасителными, знамении от небес, знамении от земли и моря, нам же окаянным безчувственне пребывающим к толицей, яже к нам, благости Твоея и всяким образом огорчевающим Тя и всякими нечестии и неизреченными беззаконии, ниже сице отвратился еси нас или оставил, неизследованна бо и безконечна есть бездна благости Твоея, еюже побежден быв, Иже един сый непобедим и всесилен, благоволил еси послати собезначального и соприсносущного Ти Сына Господа нашего Иисуса Христа на помощь и на возвращение окаянного рода нашего неблагодарных, се показание велие Твоея, яже о нас, совершенныя благости, иже не пощадел еси единородного и возлюбленного Сына своего, но выдал еси Его на страсти поносныя и смерть горчайшу, за спасение нам неблагодарным. Что велие се и страшно таинство, что толико Твое, еже о нас нечестивых и неблагодарных, человеколюбие и благость? Еда бо не можаше ли, Иже един Всесильный, иным которым образом спасти рода нашего един Всесилный? Ей, можаше, Владыко, и единым божественным Си мановением исцелити нас; что бо Тебе невозможно? Тебе всяческая работают и повинуются, аки Владыце и Содетелю. Но сице бысть благоволение пред Тобою, яко да разумно будет, еже о нас окаянных, неисчетное Твое человеколюбие и пучина щедрот Твоих и яко не точию мановение всемогущия божественныя силы Своея можеши творити превелия и предивна, но и худыми немощнейши, яже у нас; что бо немощнейши человеческия плоти страстей же и креста и смерти, в нихже и имиже посрамил еси начальства и власти темныя, но и самого имеющего державу смертную гордого и величавого сатану и диавола, иже многообразными нечестии и студодеянии на лета довольна умертвил нас безумных, егоже ныне покорил еси попрану бывати ногами благочестиве служащих божественней славе Твоей, попираем бо и поругаем бывает, якоже худая птица о отгонится непобедимым знамением креста образуемом нань. Такова, яже от Твоея благости, положена в нем божественна сила, бесы в бегство обращает, недуги отгоняет, мертвыя, аки от сна, воставляет. Мы же немощнии и убозии, что к сим противу принесем Твоей, яже о нас, благости? Ни единого от сущих у нас требуеши, вся бо Твоя и яже на небесех и яже на земли и яже в морях и безднах, ты бо всех сих и Творец и Господь; единого точию у нас от сущих ко превелицей благости Твоей требуеши и желаеши спасения нашего и неложного обращения и покаяния, еяже ради вины и на смерть выдал еси возлюбленного единородного Сына своего Иисуса Христа Господа нашего, Егоже животворною смертию мы мертвы прежде суще оживотворихомся и мрачных адских пропастей избыхом и восход, иже на небеса, обретохом и затворенный древле, по преслушанию праотца нашего, райский вход, восприяхом паки послушанием второго Адама Господа нашего Исуса Христа, егоже божественное и живоносное воскресение по вся лета празднующе веселия божественного и неизглаголанныя духовныя радости по душам исполняемся, егоже ради и воспевающе возопием, от глубины сердечныя: благословен еси, Господи Боже отец наших и препетый и превозносимый во веки веком аминь, и благословенно имя славы Твоея препетое и превозносимое во веки веком аминь, яко благоволил еси посетити нас Востоком свыше, еже есть явлением мысленного Солнца правды Исуса Христа Господа нашего, яко мертвых сущих нечестием оживотворил еси твоего благоверия светлостию, яко враги суща прежде и сыны дияволя и чада естеством гневу, други и сыны и чада возлюбленна Твоя явил еси нас, по благодати Исуса Христа Господа нашего и дарованию Святаго Духа Твоего, измыв нас божественною банею пакибытия, яко омраченных сущих нас всяческими прелестми и лжеименного разума внешних софист осветил еси нас лучами богоразумия и сокровищи неблазненного богословия и премудрости, в нихже и имиже преизобильно озаряеми, благословим неблазненно Отца и Сына и Святаго Духа, единого Бога в триех ипостасех, безначальна, несозданна, соприсносущна, безконечна, содетеля всех видимых и невидимых, преблага, человеколюбца, всякого блага подателя и виновна, пред ним же раболепно припадающе и воспевающе возопием: спаси нас Твоею благодатию, Пресвятая Троице, Содетелю всех и содержателю, сохрани нас в настоящем убо житии благоверно служащих Ти и любовная Тебе и угодная всегда совершающих, со всяким благодарением и чистым житием, а в будущем сподоби соучинитися нам божественному лику избранных Твоих, идеже шум чист празднующих и глас неизреченного радования; Ты бо еси нам Бог возлюблен, верен же и праведен, и мы людие Твои, по благодати Твоей, и разве Тебе иного не вемы, имя Твое именуем и славословим Отца и Сына и Святаго Духа единого божества и царства, Емуже подобает всяка слава, честь, поклонение, в безконечныя веки. Аминь.

Сочинения преподобного Максима Грека, изданные при Казанской Духовной Академии. Часть вторая: Нравоучительныя сочинения. – Казань: 1860. – с. 440-445.