на главнуюгде находится?как доехать?просьба помолитьсяпожертвования

Служба Преподобным отцем Старцем, иже в Оптиной Пустыни подвизавшимся


 

КАНОН БОГОРОДИЦЕ

на 6, глас 8-й:

Воду прошед:

И преподобным на 8, глас тойже.

 

Песнь 1-я

Ирмос: Воду прошед:


Монашествующим вы правило есте, в недузех сущим и скорбящим исцелители, и пастырие заблуждающих овец, вам научите песнь достойно принести.

Наставники наша восхваляюще зовем: вы есте семя свято, преподобнии отцы, земли российския хваление, и чадом вашим утверждение.

Стадоначальниче монашеских дворов, чреды наставив иноков к небесней пажити, радуйся, отче наш Паисие честный, наставивый земли российския концы.

Слезами многими и скорбным житием Феодор, инок свирский, злая претерпе, обаче тверд и крепок сый умом, в болезнех сына Льва духовно породи.

Богородичен: О Мати Дево Богородице, Христа моли, воплощшагося из Тебе, да сохранит Российскую страну, и души наша, яко милостив, спасет.

 

Катавасия: Отверзу уста моя:

 

Песнь 3-я

Ирмос: Небеснаго круга:


Основание твердо подвигом положил еси, камень краеугольный, Христа: и бысть первоначальник сонму старцев, о Льве, и прият благодать отгоняти недуги от люте страждущих.

Вопиял еси сице, о Льве, ко обидящим: пою Богу моему дондеже есмь, кто мене разлучит от любве Его; в ней же пребысть до кончины, совершая волю Его со дерзновением.

Преподобный Макарий блажен бысть воистинну, насыти бо алчущих души, туне питая всех словом, исполненным благодати, потребляя душевный глад, умиряя души, страстьми обуреваемыя.

Богородичен: От Тебе, Богомати, истече поток сладкий, вся напаяя люди, скверны душ измывая, о Богородице Дево. Темже спасай от бед всех, иже образ Твой честный почитающих.

 

Седален, глас 4-й: Подобен: Явился еси:

 

Явистеся Духа Святаго органи, отцы преподобнии, и пророчества дара сподобистеся, ибо в ваших душах возсия Свет Неприступный.

 

Слава, и ныне, Богородuчен:

Яко всех еси творений вышшая, воспевати Тя достойно недоумеюще, Богородице, молим Тя: туне помилуй нас.

 

Песнь 4-я

Ирмос: Услышах Господи:


О мудрейший Макарие, ты восторгал еси класы духовныя от писаний святых отец, и насытил еси души алчущих.

Ты наставник быв иноком во Предтечи обители, о Антоние, воздержательным житием, помолися о тя восхваляющих.

Моисее, Антоние, и по плоти и по духу суще братие, богомудрии пастыри, вы настависте овцы на пажити.

Богородичен: Богородице Чистая, цвете божественный и прозябший кореню, Ты о нас непрестанно моли, Богородицу Тя воспевающих.

 

Песнь 5-я

Ирмос: Просвети нас:


Прият Елисей от Илии благодать сугубую, на тебе же, отче Амвросие, благодать почи отец Льва и Макария.

О Амвросие, ты любовь в себе стяжал еси, совершение добродетелей, всем бо вся был еси, и убогим прибежище.

О Амвросие, ты божественною пищею напитал еси алчущия сердца, овцы своя упас на словесней пажити.

Богородичен: Мати Божия и Заступнице усердная, просвети нас, молящихся Тебе, присно молящи о нас, недостойных рабех Твоих.

 

Песнь 6-я

Ирмос: Молитву пролию ко Господу:


Сын истинный явился еси, Иосифе, стяжав родительницу безстрастия, нелицемерное послушание. И яко кроток, чист же и милостив, смиренно глаголал еси: непотребен есмь без отца моего.

 

Иосиф целомудренный верно по стопам отца своего хождаше: даже до смерти сам себе смиряше, сице Владыце Христу подражая. Сего ради молим его: научи и нас, грешных, смирению.

 

Отца своего любовь стяжав, Анатолие, с ним упасл еси словесное стадо. И ныне, отче, нас не забуди, овцы своя помяни и настави их, взыщи заблуждающих чад, наставляя всех нас ко спасению.

 

Богородичен: Заступницу Тя всем в животе моем, и хранительницу тверду, Девице, и напастей решащу молвы, и прилоги бесов отгоняющу, и сице молюся всегда: от страстей моих мя да избавиши.

 

Кондак, глас 8-й: Подобен: Взбранной:

 

Иже от мира суетнаго уклонившеся, и чистым житием coкровище обретше, попечения о грешных, сущих в мире, не ocтависте, но яко суще заблуждающим наставницы, и нас от суеты мирския избавите, яко да зовем: радуйтеся, старцы богомудрии.

 

Икос:

Ангелом поревновавше, устранистеся мира, вожделевше в пустыню вселитися. Но и нас, сущих в мире еще, не забудите, молимся мы, грешнии, да прелести избавльшеся, к вам возглаголем сице: Радуйтеся, врачеве душевных болезней; радуйтеся, целители недугов телесных. Радуйтеся, премудрых разумом превосходящии; радуйтеся, немудрых к разуму наставляющии. Радуйтеся, непрестанныя молитвы делателие; радуйтеся, о грешницех к Богу ходатаи. Радуйтеся, старцы богомудрии.

 

Песнь 7-я

Ирмос: От Иудеи дошедше отроцы:


Отче Иларионе, уклонився от мира, и вся яже в нем оставль и уметы вменив, старцем прилепися, Леониду с Макарием, власть от Христа прият бесы прогоняти.

Утешаше Исаакий, сострадательный инок, иже к нему приходящих, и силою молитвы от злых их ограждаше, заступая их всячески, яко отец или мати сый чадом своим.

Несть пророка без чести, но в дому своем токмо, всех бо изгнаша пророк. И ты изгнан быв, отче, сподобися блаженства, Варсонофие праведне, изгнание претерпевый правды ради.

 

Богородичен: Под Твою милость прибегающих верно и покланяющихся Твоему Сыну. Богородительнице, помолися Ему о нас, яко да избавимся от бед и искушений.

 

Песнь 8-я

Ирмос: Царя Небеснаго:


Славе вечней причастник бысть Нектарий, уклонився житейския славы, – всяк бо, смиряяй себе, вознесется.

Да ублажатся отцы: Анатолий, Нектарий, с ними же Исаакий и Никон. Законно пострадавше, ликуют во вся веки.

Бывше изгнани отцы от отступник, не смутишася, но возопиша: наше житие на небесех есть.

Богородичен: Помощи, яже от Тебе требующия, не презри, Дево, поющия и превозносящия Тя во веки.

 

Песнь 9-я

Ирмос: Воистинну Богородицу:


Воистинну стяжасте всяку добродетель, дарование же всяко даровася вам. Но спасите стадо ваше, молящеся за ны.

О всем благодарите, заповедь прияхом: да похвалим Бога, яко даровал есть нам вас, наставники святыя во Царствие Его.

Предстателие наши, о стране Российстей помолитеся прилежно, и спасите всех, иже память вашу верно совершающих.

Богородичен: Владычице Святая, помогай нам, грешным, и злых врагов избави Отечество наше. Тебе молим, сохрани нас под кровом Твоим.

 

Светилен. Подобен: Небо звездами:


Старцы почтим богомудрыя, светильники светлыя, подвижники благочестия, добродетелей учители, о нас молитвенники и наставники веры.

 

Слава, и ныне, Богородичен:


Сладость ангелов, скорбящих радость, христиан Предстательнице, Дево Мати Господня, заступи нас и избави вечных мук.

 

На хвалитех стихиры на 4, глас 6-и:


Подобен: Все отложше:

 

Все отложше о земных попечение, и страстей мучительство далече от себе отринувше, преподобнии отцы богомудрии, в пустыню вселистеся, и сердце очистивше, просветистеся благодатию, и яко светила возсиявше, просвещаете всю подсолнечную, тьму отгоняще от чтущих святую память вашу. (Дважды).

Духовная светила, на тверди церковней возсиявшая в последняя времена, наставляют к тихому пристанищу обуреваемых в пучине и житейскими сластьми погружаемых, греховную мглу отгоняют и бурю страстей утишают, и от злаго пути возбраняют, приводящаго в пагубу, и со дерзновением молятся о спасении душ наших.

Не ктому в гаданиих, но истиною и лицем к лицу, зерцалом разрешшимся, зрите славу Господню, ихже очи не видеша и уши не слышаша, и на сердце человеческом не взыдоша, яже уготова Бог любящим Его. Сих благих сподобльшеся, и нас не забудите, но молите и нам спастися, совершающим память вашу.

 

Слава, глас 8-й:


Воздвигше крест на рамена своя и плоть распенше со cтpaстьми и похотьми, сотросте змиеву главу, и нас явите победители греха, и покаяния достойныя плоды принести научите.

 

И ныне, Богородичен, глас той,же:


Владычице, приими молитву раб Твоих, и избави нас от всякия нужды и печали.

 

Славословие великое. Тропарь. Слава, и ныне, Богородичен.

 

НА ЛИТУРГИИ

 

Блаженна от канона, песнь 3-я и 6-я на 8.

Прокимен, глас 7-й: Честна пред Господем смерть преподобных Его.

Стих: Что воздам Господеви о всех, яже воздаде ми;

Апостол к Галатом, зачало 213-е.

Аллилуия, глас 6-й: Блажен муж бояйся Господа, в заповедех Его восхощет зело.

Стих: Сильно на земли будет семя Его.

Евангелие от Луки, зачало 24-е.

Причастен: Радуйтеся праведнии о Господе, правым подобает похвала.


Предыдущая страница | Страница 2 из 2

 

 

 

© 2005-2015   Оптина пустынь - живая летопись