на главнуюгде находится?как доехать?просьба помолитьсяпожертвования

Служба Преподобным отцем Старцем, иже в Оптиной Пустыни подвизавшимся


СЛУЖБА

ПРЕПОДОБНЫМ ОТЦЕМ СТАРЦЕМ,

ИЖЕ В ОПТИНОЙ ПУСТЫНИ ПОДВИЗАВШИМСЯ

(месяца октоврия в 10-й день)

 

НА ВЕЛИЦЕЙ ВЕЧЕРНИ:

 

Блажен муж: 1-й антифон.

 

На Господи воззвах: стихиры на 8, глас 4-й:


Подобен: Яко добля:


Преподобнии старцы оптинстии, вы, иго Христово вземше, постом и молитвами и частыми бдении потрудившеся, просиясте надеждею и верою, наипаче же любовию, яже есть глава добродетелем, еюже согреваете приходящыя к вам. (Дважды).


Послушания усерднии подвижницы, воли своя покорившии окормлению отец своих, духовне вас породивших, восприясте помощь на сопротивника глубочайшее смирение, имже разрушисте козни вражия: ничтоже бо может враг на смиренныя.

 

Православных людей окормителие, вы апостольски взываете: ничтоже ны разлучит от любве Божия. Вы хуждшее покористе лучшему и плоть поработисте духу. Тем явистеся светильницы Церкве, не под спудом, но на свещнице поставлени, да прославят Отца Небеснаго видящии дела ваша.

 

Ины стихиры, глас 8-й:

 

Подобен: О преславнаго чудесе!


О преславнаго чудесе! Посреде житейския молвы отцы богомудрии несмущено сердце сохраниша, пребывающе с человеки телесне, мысленне же Богу предстояще, покрываеми кровом крилу Его, носящии дух мирен, имже многи ко Христу привлекоша. (Дважды).


О молитвенницы пребогатии, Духа Святага органи, глаголюще молитву непрестанную в сердце сокрушенном и смиренном, просияете ангельским безстрастием, и сего ради показастеся врачеве душам и телесем: пощадите и спасите нас, многими страстьми обуреваемыя.

 

О старцы преподобнии, Духа Святаго сосуди, даровании благодатными наздавшии Церковь Христову, вы поревновасте духовным, пророчества дар стяжавше, глаголюще человеком полезная в назидание и утешение, пророком древним уподобльшеся.

 

Слава, глас 6-й:


Узы разрешше страстей, прилепистеся любви благих, во Христа облекостеся, воздержанием и смирением наследницы бывше вышняго живота: темже от трудов обретше упокоение, достойно радуетеся с горними силами, преподобнии отцы Оптинстии, прегрешений оставление испросите празднующим любовию святую память вашу.

 

И ныне, Богородичен, глас тойже: Кто Тебе не ублажит:

 

Вход, прокимен дне, и чтения три:

1. Премудрости Соломоновы чтение. Глава 4-я.

Праведник аще постигнет скончатися:

2. Притчей чтение. Гл. 10.

Память праведнаго с похвалами:

3. Притчей чтение. Гл. 10 и 11.

Уста праведнаго каплют премудрость.

 

На литии стихира, глас 2-й:


Яви нам дивный во святых Своих Бог, новыя подвижники благочестия, преподобныя старцы оптинския, иже в Бозе пребывающе, узреша Христову доброту, осияеми тайно божественными светлостьми.

 

Глас 4-й:


Не дасте сна очесем вашим, блаженнии, ни веждом дремания, дондеже достигосте в любовь Божию, яже излияся изобильно на вы: темже восприясте божественная дарования, душетленныя страсти исцеляете, и недуги верою врачуете, и отгоните скверныя духи: отцы преподобнии, молите о душах наших.

 

Слава, глас 5-й:


Приидите, благочестия ревнители, отцы наша духовныя похвалим: Леонида, Моисея и Антония, Исаакия, Макария и Анатолия, с нимиже Илариона и Варсонофия, со Иосифом великаго Амвросия, инаго Анатолия и Нектария, и мученики Никона и Исаакия. Старцев великих песньми почтим, к нимже взывающе возопиим: преподобнии отцы богомудрии, не престайте о нас молящеся, вы бо есте заступницы наши.

 

И ныне, Богородичен, глас тойже: Храм и дверь еси:

 

На стиховне стихиры, глас 4-й:

 

Подобен: Званный свыше:


Возложился еси Вседержителю, отче преподобне Льве, егда душа твоя распалися божественным желанием, и ум твой к горним окрили. Тогда мир оставил еси, и вся яже в мире, и последовал еси Христу невозвратным помыслом, ничтоже предпочет паче любве Его. Его же моли спасти и просветити душы наша.

Стих: Честна пред Господем смерть преподобных Его.

 

От юности, преподобне Макарие, Бога возлюбив, Тому вседушно последовал еси, ничтоже предпочет сущих в мире, но вся уметы вменив, потщался еси благоугодити Богу, заповедьми Его утверждаяся: темже желания конечнаго достиг, Христу предстоиши, Его же моли спасти и просветити души наша.

Стих: Что воздам Господеви о всех, яже воздаде ми.

 

Преподобне отче Амвросие, любовь совершенную к Богу и ближним стяжал еси, яже есть союз совершенства, и сый иноком украшение, и живущим в мире утешение, собрал еси инокинь чреды, всем быв вся по апостолу, привел еси чада своя ко Владыце, Его же моли спасти и просветити души наша.

 

Слава, глас 8-й:


Светом Троическим осиявшеся, отцы преподобнии, тьмы избежасте сластей, и светильницы явистеся, просвещающе верных сердца. Темже светоносную вашу память совершающе, согласно взываем: богоноснии и пребогатии, молите Христа Бога, согрешений оставление даровати чтущим святую память вашу.

 

И ныне, Богородичен, глас тойже: Безневестная Дево:

Тропарь, глас l-й:


В молитвах непрестанных пребывающе, благия же и злыя любовию объемлюще, преподобнии старцы Оптинстии, Богу и ближним послужисте, бдением, слезами и пощением дарование многоразличных чудес приясте. Слава давшему нам таковыя ходатаи, слава Прославльшему вас, слава Богу дивному во святых Своих.

Слава, и ныне, Богородичен: Гавриилу вещавшу Тебе, Дево:

 

НА УТРЕНИ

 

На Бог Господь: тропарь преподобным, дважды.

Слава, и ныне, Богородичен. Гавриилу вещавшу Тебе, Дево:

 

По первом стихословии седален, глас 8-й.

Подобен: Повеленное:


Страсти безсловесныя душевными силами покорше преподобнии, словесному вашему стаду благодеяния подаваете, от Христа Бога дарованием исцелений обогащшеся. Тем же священное ваше и светоносное торжество совершающе, просим очищения душам нашим. (Дважды).

 

Слава, и ныне, Богородичен:


Богорадованная, Чистая, Благословенная, за милосердие щедрот из Тебе Рождшагося, с преподобными отцы и старцы, и со всеми святыми, о нас моли непрестанно, дати нам прежде конца прощение грехов, и жития исправление: яко да обрящем милость.

 

По втором стихословии седален, глас 8-й.

Подобен: Повеленное:

 

Великих даров сподобльшеся, преподобнии, во смиренном житии на земли пожисте, туне недугующих страсти врачующе, явистеся ангелом собеседницы, всеблаженнии отцы Оптинстии, и наша страсти молитвами вашими уврачуйте. (Дважды).

 

Слава, и ныне, Богородичен:


Непостижимаго Слова Сына Божия, несказанно паче ума из Тебе Рождшагося, Богородице, моли с преподобными, умирение вселенней подати, и прегрешений даровати нам прежде конца прощение, и Царствия Небеснаго, крайния ради благости, сподобити рабы Твоя.

 

Полиелей и величание:


Ублажаем вас, преподобнии отцы Оптинстии, и чтем святую память вашу, наставницы монахов и собеседницы ангелов.

 

Псалом избранный: Терпя потерпех Господа:

 

По полиелеи седален, глас l-й.

Подобен: Гроб Твой Спасе:


Неизреченна святых благодать, юже от Христа прияша, темже верою призываеми, неисцельныя болезни исцеляют, и мощи их божественною силою действуют чудеса. Молитвами их, Господи, и нас душевных и телесных страстей свободи, яко Человеколюбец.

 

Слава, и ныне, Богородичен:


Матерь Тя Божию cвeмы вси, Деву воистинну и по Рождестве явльшуюся, иже любовию прибегающии к Твоей благости, Тебе бо имамы грешнии предстательство, Тебе стяжахом в напастех спасение, Едину Всенепорочную.

 

Степенна, l-й антифон 4-го гласа. От юности моея:

 

Прокимен, глас 4-й: Честна пред Господем смерть преподобных Его.

Стих: Что воздам Господеви о всех, яже воздаде ми.

 

Евангелие от Матфея, зачало 43-е.

 

По 50-м псалме стихира, глас 6-й:


Все отринувше страстное мучительство, и всяко умышление лукаваго змия поправше о Христе, преподобнии отцы Оптинстии, светообразни явистеся, яко светила озаряюще всю подсолнечную, тьму отгоняюще, и недуги благодатию врачующе, и всем помощницы являющеся, верою творящим святую память вашу.

Страница 1 из 2 | Следующая страница

 

 

 

© 2005-2018   Оптина пустынь - живая летопись